最新烏白蛇放水歌上冊 來說漢人許白氏 夫妻和順過日子 原舊藥店再開起 招牌掛出做先生 遇着知府一夫人 因為生產三日停 就請漢文去醫治 遂時產出兩男兒 自此醫生真時行 保和一店有名聲 在地醫生共藥鋪 因為同藝來看姤 衆人齊衆來思量 明日藥王卜聖壽 派伊爐主來安牌 安牌古董在廟內 伊是充軍來到只 决無只物提出去 衆人下齊來尋伊 出阮心中只恨氣 漢文只聽只代誌 就共白氏說知機 可恨同店大不是 派我值頭係寶器 若無寶器提出去 袂堪一嘴共一舌 未知娘子乜主意 免得衆人來羞恥 珍娘心內有主意 官人不免來驚疑 妾身代來有寶器 等待明日提出去 就叫小青暗通知 汝着京城梁府去 偷伊四件好寶器 四件孔雀玉孩兒 小青遂時暗偷去 明早廟內一齊去 个个搖頭共吐舌 四件寶貝世間稀 京城梁王尋無見 尋無寶貝心驚疑 就差家將各省去 卜捉正犯來律治 家將奉命一路來 行到蘇州探聽知 人人傳說許家內 四件寶貝一齊在 遂時走到保和堂 看見物件在中央 正是梁府庫內物 一齊入去就掠伊 就罵漢文大不是 敢偷梁府庫內物 拖拖拔拔衙門去 說乞知府得知機 知府坐堂看見伊 正是漢文只先生 為乜做出只代誌 偷出梁府庫內物 漢文跪落說名姓 小人平日做行醫 一生安分共守■ 不敢偷取人些厘 因為祖師生日時 值頭着牌好寶器 幸得白氏阮妻兒 提出只物牌出去 知府心內暗知機 火簽隨時卜掠伊 不料差役行入去 並無一人在內裏 知府心內有主意 知是白氏是妖精 苦卜照律來辦起 漢文姓命總着死 念伊前日有恩情 用約救好我夫人 從輕擬罪來處治 報答前日只恩義 就對漢文說知機 憐你被妖來創治 發配充軍鎮江只 報答前日只恩義 漢文充軍到鎮江 幸遇徐家大恩人 收留在家安身已 代剝充軍只名字 來說白氏共小青 聽見差役來門前 遂時用出變身法 乎了差役掠無人 娘●收拾銀共錢 探聽充軍鎮江去 駕落雲頭來到只 原舊藥店做生理 藥店招牌保和堂 店口整落正皇堂 知醫名字許漢字 藥丸每粒賣分五 來說漢文得一病 十分沉重九分死 先生請來儿十人 並無身子小輕鬆 徐乾員外苦傷悲 聽見丸散真行時 就買一灌食落去 食了一更好離離 漢文起來就問伊 感謝員外好情意 買乜丸散來救治 恰好仙丹實無二 員外說了喜忙忙 東街一店保和堂 兩个美人在店內 店口親身買藥材 先生名字許漢文 丹丸每粒賣五分 愚兄買來你食去 無疑一粒就行氣 漢文聽見暗驚疑 就對員外說知機 漢文是弟親名字 其中必定有外欺 明早起來有主意 就外員招同娶去 看見二妖住店內 一時受氣怒冲天 就罵無恥二妖精 又再纏我作什乜 今旦你們又到只 直欲害我到我死 白氏被罵面通紅 就叫漢文許官人 記在浙江贈銀兩 被你姐夫來出手 知縣不察乜因由 將你發配到蘇州 蘇州帮你做生理 又教官人做行醫 店內先生好無比 趁了多少銀共錢 因為值頭牌寶器 物件值錢價無比 不料大賊看一見 買囑官府就掠你 世上寃枉千共萬 何止妾身一个人 自聞官人配充軍 冥日煩惱淚紛紛 千里尋你來到只 為着夫婦只恩義 不料官人心僥倖 罵我妖精害你身 不念結髮只恩情 着念懷胎只情人 別人尚有憐共憫 虧你只般障絕情 說到這句苦傷悲 放聲大哭淚淋漓 漢文本是貪着伊 聽伊言語返心意 就叫娘子莫受氣 娘子恩情大如天 小青看見笑微微 以后官人着改變 后日若是再罵起 着卜共你見生死 漢文應允心大喜 就招員外同入去 辦了山珍共海味 請着員外酒微微 員外看見只白氏 生成文理賽西施 返去想思致一病 長吁短嘆無別時 伊妻陳氏着驚疑 看見員外只樣病 就問為着乜事誌 冥日思想無離時 員外自知只事誌 未便共妻說知機 只是搖頭不說起 目滓流落滿床是 員外着病未幾時 病勢沉重未得起 遍身如火冥日是 有時暈落親像死 家內大小着驚疑 食了無效思計智 卜請佛祖通救治 試問犯着是障年 一味家人暗知機 就對衆人來說起 眼前活佛不跪拜 何用死佛請入內 陳氏聽見就問伊 你講只言真巧奇 員外今旦着只病 照實講來我知機 家人被問說因由 員外只船老風流 看見白氏生縹緻 返來思想致只病 陳氏聽見就知機 思着好笑亦好氣 就入房內卜問起 叫聲員外是障年 員外被問目金金 並無半句通音信 目滓流落不自禁 長吁短嘆共擋匈 陳氏再三問因由 聽見官人老風流 不妨共我說照實 阮身不是食錯心 員外被問說透枝 看見白氏生文理 返來相想致只病 只病總是無藥醫 會得共伊近身邊 只病無藥好離離 若是用出無計智 老命總着歸陰司 陳氏聽見笑微微 官人食老愈呆癡 家內妻妾共女婢 何用思伊作什乜 不料官人坎戇起 被伊思想致一病 待我思落一計智 救你性命食幾年 員外聽見喜半天 隨時翻起卜問伊 未知夫人乜計智 緊緊用出免我死 陳氏沉吟思計知 假說花園牡丹開 做我請伊花園內 同賞牡丹洒安排 官人暫住床後面 待我請伊去更衣 假意我身慙出去 不怕里魚不食利 隔了幾日有主裁 放帖假說牡丹開 請入白氏花園內 一桌酒筵來安排 二人飲酒笑微微 就請珍娘去更衣 相招行入房內去 假意出來叫女婢 珍娘心內不知機 正在房內去更衣 床後員外看一見 走來床前跪求伊 自從看你生縹緻 返來思想病險死 今旦望娘請歡喜 後世不忘恁恩義 白氏伸手拉伊起 叫聲員外免障年 妾夫受你好情意 解罪除名只恩義 正在圖報恁恩情 何惜意愛阮一身 但恐阮君來看見 反成無雅卜障年 員外聽見喜紛紛 既蒙珍娘來應允 只計是伊辦出來 院君斷斷無入內 白氏笑笑就應伊 原來是恁好計智 既然意愛卜成意 着掩房門免人知 說了目尾拖過去 先上眠床笑微微 就對蚊帳放落去 呌伊關門莫延遲 員外看見滿心喜 趁緊房門關上去 翻身行到眠床邊 拆開羅帳卜上起 一時看見心驚忙 為乜床上障空空 大呼小叫卜着狂 恰慘小鬼見閻王 陳氏聽見着驚疑 趕緊破門走入去 未知珍娘在■去 只看員外倒在地 倒落嘴開目柴柴 一身直直冷到脚 童便姜湯來救活 救了垂頭共喪氣 床前看見一首詩 罵落員外大無理 叫伊緊緊着改變 免得老命歸陰司 陳氏看見就知機 就罵員外老早死 為乜貪伊生縹致 到只地步想恰伊 明早漢文卜討人 討無人去罪真重 萬一官司來告起 家伙總着了離離 員外思着心驚疑 一日過了一日時 看見漢文無言起 心肝暫暫放落去 來說珍娘用計智 隱了身法就返去 只事全然無提起 有共小青暗通知 漢文許日思無意 思卜上街看景致 翻身來到金山寺 金山禪師法海伊 法海看伊着妖氣 就請漢文入內去 就問你妻是白氏 名叫珍娘是不是 漢文聽見着一驚 上前就說法海聽 白氏珍娘阮娘子 禪師為乜知伊名 法海掠話說出來 客官為乜全不知 恁厝一娘一女婢 就是烏白二蛇精 偷落庫銀共寶器 兩次受罪充軍去 記得五月端午時 請你雄黃酒灌去 露出原形在床邊 一時被蛇來驚死 你今不通回家去 免得性命歸陰司 漢文聽見心驚忙 親像肚腹割肝腸 跪落地上苦哀哀 懇求師父憐憫來 法海扶起就勸伊 我是出家人慈悲 客官既然會曉意 暫住寺內安身已 若是二妖得知機 定然不聽來尋你 等待二妖別處去 放你出路也未遲 來說珍娘在家內 看見漢文未返來 將指屈算只件代 一時目滓淚哀哀 小青近前叫娘娘 為何面容障憂愁 未知為着乜件代 不妨共婢說出來 白氏說落喃淚啼 漢文被留金山寺 可恨法海大不是 生言造語來騙伊 必定說破阮根基 害着官人不返回 從此夫妻絕情意 虧阮青春卜障年 小青掠話就說起 娘娘不免苦傷悲 記得前日六一伊 六一道士來騙你 乎你吊落在半天 好好哀求者放伊 六一道士尚且治 何怕金山禿驢精 白氏掠言就說起 你知其一不知二 法海佛法妙無比 不比六一道士伊 二人同行金山寺 懇求師父做情意 放出官人阮相見 乎阮夫妻再團圓 二妖行到金山寺 寺前就叫小沙彌 拜托入內通報知 有人卜尋漢文伊 法海出來看一見 就罵孽畜好無理 勸你緊緊別處去 免得性命歸陰司
